阿公kah 我：認bat 母語文學e熱--人

序
國立臺東大學兒童文學研究所副教授兼任所長  游珮芸

2017年初，國立臺灣文學館開始策劃共已經編撰出版ê「臺灣文學史長編」轉化作繪本形式ê兒少讀物，《阿公kah我：認bat母語文學ê熱--lâng》是這个系列推出ê第三本繪本；源自長編第33冊廖瑞銘教授tsip-pit ê《舌尖與筆尖──臺灣母語文學的發展》，嘛是臺東大學兒童文學研究所團隊第二次參與這个策劃ê成果。

阮ê任務是共長編ê專題研究一理通萬理徹，khîng出當中ê核心概念kah重點，用簡單好捌ê方式傳達予兒少讀者。學術論文形式ê內容，一般較捷被轉化作小百科形式ê智識性讀物。毋過阮希望會當透過好讀 koh吸引人ê故事，帶領兒少讀者入去議題ê情境，tī圖文故事ê鋪排當中，自然引起對母語文學ê興頭。甚至大人讀者tī翻看這本繪本ê時，嘛看甲真有意神，有食koh有掠。

《舌尖與筆尖──臺灣母語文學的發展》ê內容主要是tshiau-tshuē母語運動ê過程、運動當中爭議ê議題，tshián-su̍t母語文學社群ê形成，以及母語文學作家kap作品ê總況。當中講著1980年代以後才出現「母語文學」ê特定意識，其中以臺語文學投入ê人較濟，爭議嘛濟，文學成果嘛siong-tuì豐富；因此，論文大部分ê phian-hok，tsū-Tsiau tī臺語文學ê演進歷程。所以，阮創作ê故事，嘛以「臺語文學」為範圍。

為著倚近小讀者ê生活情境，阮共故事設定tī現代。主角是小學五年級ê阿文，伊因為參加學校ê布袋戲社團，開始學習用臺語搬布袋戲，紲落thàm-soh「臺語」書寫ê形式以及背後ê文化。此外，koh設定阿文ê阿公有參加過1980年代ê母語運動，是一位教臺語文學書寫ê老師，而且阿文ê屘姨tī臺語文出版社上班。

故事對阿公ê追思會起鼓。阿文轉去阿公ê舊厝，tī阿公ê冊房內，看著一首用羅馬字寫ê詩，對阿文來講，彼就親像是「天書」仝款。透過tī社團母語老師ê教學，阿文才知影臺語有三種書寫方式：「全漢文」、「漢羅文」kah「全羅文」。嘛對屘姨送ê字典、教育部ê線頂辭典、布袋戲社ê搬演、臺語文學營ê開破，阿文最後看bat彼首詩——原來彼是阿公tī伊出世ê時，為伊寫ê一首詩。

情節ê主軸，是一个解謎ê歷程。最後一个畫面，本成是阿公舊厝門口埕徛黃ê土檨仔樹，發葉矣，頂面有鳥仔岫，鳥母當咧飼鳥仔囝。拄好siōng-ting這段thàm-soh ê旅程，帶來再生kah傳承。文字主筆鄭若珣巧妙tī情節當中穿插了臺語運動ê歷史，並且編寫了暗喻往過語言政策ê「筆劍大儒俠」劇本 ; 繪者周見信自細漢是布袋戲迷，他畫出了艷色ê戲臺kah戲尪仔，設計了予人文文仔笑ê前後蝴蝶頁。

繪本內，有兩首臺語詩。Tī臺語出版社上班ê林杏娥，協助創作了弔念阿公ê「siàu 念」，鏗硿有力。我提供了「Huann-hí tú-tio̍h lí」ê初稿。彼是我第一个囡仔出世ê時，為伊所寫ê詩。彼當時我人tī日本，四周遭攏是日文。不而過怪奇ê是，彼陣，我用臺語——我ê「母語」，寫了真濟育囡仔詩。彼是源自身軀kah情感，自然liû-lōo ê詩句。

Tī遮，愛感謝國立臺灣文學館ê審查委員，提供真濟意見kah臺語文相關修改ê建議，予這本創作更加完善。期盼《阿公kah我：認bat母語文學ê熱--lâng》會當激發小讀者ê thàm-soh母語文學ê興趣，引起廣大讀者ê kiōng-bîng。予咱同齊為母語文學ê傳承，盡淡薄仔心力。